ກອງປະຊຸມສາມັນ ຄົບຄະນະກຳມະການແນວລາວສ້າງຊາດ ເມືອງແບງ ແຂວງອຸດົມໄຊ ຄັ້ງທີ 5 ສະໄຫມທີ VII ໄດ້ຈັດຂຶ້ນວັນທີ 17 ພຶດສະພາ 2023 ທີ່ສະໂມສອນເມືອງແບງ ໂດຍການເປັນປະທານຂອງທ່ານ ສົມສີ ບໍລິວັນ ກໍາມະການປະຈໍາພັກເມືອງ ປະທານແນວລາວສ້າງຊາດເມືອງແບງ ເປັນກຽດເຂົ້າຮ່ວມໂດຍທ່ານ ວັນນາ ແກ້ວສັນຕິ ປະທານອົງການແນວລາວສ້າງຊາດແຂວງອຸດົມໄຊ, ມີຄະນະກຳມະການແນວລາວສ້າງຊາດເມືອງ, ບ້ານ, ອົງການພາຄີ, ຜູ້ຊົງຄຸນວຸດທິດ, ພະນັກງານແນວລາວສ້າງຊາດເມືອງ ເຂົ້າຮ່ວມ.
ກອງປະຊຸມໃນຄັ້ງນີ້, ໄດ້ຕີລາຄາຄືນຜົນການເຄື່ອນໄຫວຈັດຕັ້ງປະຕິບັດວຽກງານຮອບດ້ານ ຂອງແນວລາວສ້າງຊາດທົ່ວເມືອງແບງໃນໄລຍະ 1 ປີຜ່ານມາ ແລະ ຜ່ານທິດທາງແຜນການເຄື່ອນໄຫວໃນປີ 2023. ທັງເປັນການປຶກສາຫາລື ແລກປ່ຽນ ແນວຄວາມຄິດ ເຊິ່ງກັນແລະກັນ ລະຫວ່າງອົງການແນວລາວສ້າງຊາດເມືອງ ກັບ ອົງການແນວລາວສ້າງຊາດບ້ານ, ແລະ ອົງການພາຄີ ໂດຍແນ່ໃສ່ເຮັດໃຫ້ວຽກງານດັ່ງກ່າວ ສືບຕໍ່ເຄື່ອນໄຫວໄປຕາມທິດທາງແຜນການ ແລະ ມີຜົນສຳເລັດຕາມລະດັບຄາດຫມາຍ. ຕະຫລອດໄລຍະ 1 ປີຜ່ານມາ ອົງການແນວລາວສ້າງຊາດເມືອງແບງ ສາມາດຍາດໄດ້ຜົນງານ ແລະ ມີຜົນສຳເລັດຫລາຍດ້ານ ທັງດ້ານການສ້າງຄວາມສາມັກຄີປອງດອງຂອງປະຊາຊົນບັນດາເຜົ່າ, ເສີມສ້າງຄຸນນະທຳຂອງສາສະໜາ, ຊຸກຍູ້, ສົ່ງເສີມບົດບາດຂອງບັນດາຊັ້ນຄົນ ແລະ ການຈັດຕັ້ງສັງຄົມ, ການຮ່ວມມືກັບອົງການພາຄີ ແລະ ສາກົນ, ການສ້າງຄວາມເຂັ້ມແຂງໃຫ້ແກ່ອົງການແນວລາວສ້າງຊາດແຕ່ລະຂັ້ນ.
ຈາກນັ້ນ, ທ່ານ ວັນນາ ແກ້ວສັນຕິ ປະທານແນວລາວສ້າງຊາດແຂວງ ໄດ້ເນັ້ນໜັກໃຫ້ຜູ້ແທນກອງປະຊຸມ ຕ້ອງກຳແໜ້ນທີ່ຕັ້ງພາລະບົດບາດຂອງຕົນຢ່າງເລິກເຊິ່ງ ເຕົ້າໂຮມຄວາມສາມັກຄີປອງດອງຂອງປະຊາຊົນບັນດາເຜົ່າໃຫ້ເປັນປຶກແຜ່ນແໜ້ນໜາ, ຍົກສູງນ້ຳໃຈຮັກຊາດ, ຮັກບ້ານເກີດເມືອງນອນ ແລະ ຮຽກຮ້ອງໃຫ້ຄະນະກຳມະການແນວລາວສ້າງຊາດເມືອງ ເອົາໃຈໃສ່ປັບປຸງແບບແຜນວິທີເຮັດວຽກໃຫ້ມີຄວາມໜັກແໜ້ນກວ່າເກົ່າ, ແທດເໝາະກັບສະພາບຄວາມເປັນຈິງ ເພື່ອໃຫ້ຖືກຕ້ອງ ແລະ ສອດຄ່ອງກັບວຽກງານແນວລາວສ້າງຊາດ, ສຶບຕໍ່ບຸກທະລຸທາງ 4 ດ້ານໃຫ້ປະກົດຜົນເປັນຈິງເພື່ອ, ເຮັດໃຫ້ການສ້າງສາພັດທະນາເມືອງແບງ ໃຫ້ມີຄວາມສີວິໄລ ແລະ ຈະເລີນກ້າວໜ້າຢ່າງບໍ່ຢຸດຢັ້ງ. ໃນໂອກາດດັ່ງກ່າວນີ້, ແນວລາວສ້າງຊາດແຂວງ ຍັງໄດ້ມອບໂທລະໂຄ່ງຈໍານວນ 1 ຊຸດ ເຊີ່ງປະກອບມີ: ດອກປາກເລີ 2 ດອກ, ແອ໋ມ 1 ເຄື່ອງ, ໄມ 1 ອັນ ແລະ ສາຍໄຟ 1 ກໍ້ ລວມມູນຄ່າ 22 ລ້ານກວ່າກີບ.
