ໃນຕອນເຊົ້າວັນທີ 25 ພະຈິກ 2023 ນີ້ ຢູ່ທີ່ເດີນບານເມືອງແບງ ແຂວງອຸດົມໄຊ ໄດ້ມີພິທີເປີດງານເທດສະການສົ່ງເສີມສິນຄ້າຜ້າຝ້າຍພື້ນເມືອງ ຄັ້ງທີ 5 ປະຈໍາປີ 2023 ຂື້ນຢ່າງເປັນທາງການ ໂດຍການເປັນປະທານຂອງທ່ານ ສົມຄິດ ກັນສະໜິດ ກໍາມະການພັກແຂວງ ເລຂາພັກເມືອງ ເຈົ້າເມືອງໆແບງ, ເປັນກຽດເຂົ້າຮ່ວມມີ ທ່ານ ຄໍາດີ ວົງລ້ອມ ຮອງເລຂາພັກແຂວງ ປະທານສະພາປະຊາຊົນແຂວງອຸດົມໄຊ, ທ່ານ ສຸຫັວດ ມະຫາວົງສະໜັ່ນ ກໍາມະການປະຈຳພັກແຂວງ ຫົວໜ້າຄະນະຈັດຕັ້ງແຂວງອຸດົມໄຊ ຜູ້ຊີ້ນໍາເມືອງແບງ. ມີແຂກເຊີນຈາກພະແນກການອ້ອມຂ້າງແຂວງ, ຕ່າງແຂວງ, ການນໍາຂັ້ນເມືອງ, ນັກທຸລະກິດ, ພະນັກງານ-ລັດຖະກອນ, ທະຫານ, ຕະຫຼວດ, ນັກຮຽນ ຕະຫຼອດຮອດມວນຊົນຊາວເມືອງແບງ ເຂົ້າຮ່ວມຢ່າງພ້ອມພຽງ.

ທ່ານ ສອນເພັດ ອິນທະປັນຍາສັກ ຮອງເຈົ້າເມືອງໆແບງ ຮອງປະທານຈັດງານ ໄດ້ລາຍງານການກະກຽມຄວາມພ້ອມຈັດງານເທດສະການສົ່ງເສີມສິນຄ້າຜ້າຝ້າຍພື້ນເມືອງ ຄັ້ງທີ 5 ປະຈໍາປີ 2023 ໃຫ້ຮູ້ວ່າ ຈຸດປະສົງການຈັດງານ ເພື່ອເປັນການຊຸກຍູ້ສົ່ງເສີມການທ່ອງທ່ຽວ, ທີ່ເປັນມູນເຊື້ອຂອງບັນດາເຜົ່າ, ແນ່ໃສ່ກະຕຸ້ນເສະຖະກິດພາຍໃນເມືອງ, ໃຫ້ມີຄວາມເຂັ້ມແຂງ, ໂດຍການຄຸ້ມຄອງ, ພັດທະນາ ແລະ ສົ່ງເສີມການທ່ອງທ່ຽວທາງທໍາມະຊາດ, ປະຫັວດສາດ, ແລະ ວັດທະນະທໍາ ສຸມໃສ່ການພັດທະນາການທ່ອງທ່ຽວພາຍໃນເມືອງ, ໃຫ້ຮັບປະກັນດ້ານຄຸນນະພາບໃນການບໍລິການ ເພື່ອສ້າງລາຍຮັບໃຫ້ຫຼາຍຂື້ນ ທັງເປັນການຍົກສູງຄວາມຮູ້ຂອງທົ່ວສັງຄົມ ກໍ່ຄືປະຊາຊົນບັນດາເຜົ່າ ໃຫ້ເຫັນຄວາມສໍາຄັນການທ່ອງທ່ຽວ, ກໍ່ຄືວຽກງານຫັດຖະກໍາຜ້າຝ້າຍພື້ນເມືອງ, ໃຫ້ໄດ້ຮັບການພັດທະນານັບມື້ດີຂື້ນເທື່ອລະກ້າວ, ກິດຈະກໍາເທດສະການຜ້າຝ້າຍພື້ນເມືອງ ເປັນການສະທ້ອນໃຫ້ເຫັນທ່າແຮງ ທີ່ສ່ອງແສງໃຫ້ເຫັນວິຖີຊີວິດ, ຂອງປະຊາຊົນບັນດາເຜົ່າ ເພື່ອດຶງດູດນັກທ່ອງທ່ຽວ ເຂົ້າມາທ່ຽວເມືອງແບງໃຫ້ນັບມື້ຫຼາຍຂື້ນ.

ການຈັດງານເທດສະການຜ້າຝ້າຍພື້ນເມືອງຂອງຊາວເມືອງແບງຄັ້ງນີ້ ຍັງໄດ້ຈັດໃຫ້ມີຫລາຍກິດຈະກຳທີ່ສຳຄັນເຊັ່ນ: ຕະຫຼາດນັດຂາຍສິນຄ້າຜະລິດຕະພັນທີ່ເປັນສີໄມລາຍມືຂອງປະຊາຊົນບັນດາເຜົ່າພາຍໃນເມືອງ, ຕ່າງເມືອງ ແລະ ຕ່າງປະເທດ, ກິດຈະກຳຊິມອາຫານພື້ນເມືອງ ແລະ ອື່ນໆ ເຊີງຈະໄດ້ດໍາເນີນໄປເປັນເວລາ 7 ວັນ ເລີ່ມແຕ່ວັນທີ 25 ພະຈິກ ຫາ ວັນທີ 1 ທັນວາ 2023.
ພາຍຫຼັງເປີດງານຢ່າງເປັນການແລ້ວ ການນໍາທຸກພາກສ່ວນກໍໄດ້ຢ້ຽມຊົມກິດຈະກຳການເຂັ້ນຝ້າຍ, ແຂ່ງຂັນຕໍ່າຫູກ, ແຂ່ງຂັນຜ້າແພງານ, ຊີ້ມອາຫານພື້ນເມືອງຂອງແຕ່ລະເຜົ່າ, ຊົມຕະຫຼາດນັດຫັດຖະກໍາພື້ນເມືອງ, ຫັດຖະກໍາຈັກສານ ແລະ ອື່ນໆ.